واد عربيد
طول عمري و انا واد دماغي مفتحه و زي ما بيقولوا " Open Minded " و دايماً كنت بفسر كل حاجه لمصلحتي.. و بما إني شهواني بطبعي .. ممكن أدمن أي حاجه … و ممكن أعمل أي حاجه .. من غير أدني تأنيب للضمير أو إحساس بالذنب.
كنت شاب رياضي و صحتي حلوه و لما دخلت الكليه بطلت ألعب عشان طبيعة الدراسة العملية … شربت سجاير عشان المفروض وقتها إني مكنتش أشربها … و مقتنع تماماً إن التدخين متعه و اللي بيدخن و يقول إنه بيدخن لسبب تاني يبقي كداب … يا إما مبيفهمش و مش عارف هو بيتنيل يشربها ليه.. أو أهبل و بيضحك علي نفسه.
بما إن الكلام دخل في نظام اعترافات ليلية … يبقي لازم أوضح النقطه دي … أنا بس برصد الدوافع اللي هي أهم حاجه في أي فعل بيعمله الإنسان.
و بما إني مدمن متعه … يبقي كده أكيد أي حاجه فيها متعه هدمنها … معنديش أي مشكله.
و زي واحد صحي الصبح اكتشف فجأة إنه بيعرف يغني … صحيت علي حاجه غريبه جداً … بنتين زمايل واحد صاحبي في كليه تانيه … الاتنين بيكلموني و دي تقولي تعالي اخرج معانا و التانيه تقولي نفس الكلام.
اكتشفت موهبه غريبه جداً … إني جذاب .. بجد .. مع إني مش جثه جامده ولا حاجه لكن لما أي واحده تتعامل معايا شويه تلاقيها ماتت.. و يتهيقلها انها اتدهولت في حب المدعوق اللي هو أنا !!!
معرفش يمكن تكون طريقتي في الكلام أو طريقة معاملتي .. عرفت الأسباب بالتفصيل بعدين …
واحد ذكي جداً زي حالاتي … أصل انا أذكي من 99% من البشر " و مهياش انتخابات " … دا مش كلامي دا كلام دكاتره و متخصصين من أيام ما كنت عيل .. الموضوع دا عملي مشاكل كتير في بلد زي مصر اللي من غير مناسبه بموت فيها..لما حبة مانجه مستويه علي فرع عالي في الشجره تقع في حجره .. هياكلها الأول و بعدين يشوف هي وقعت ليه … هو أنا عبيط زي نيوتن ؟!
الخلاصه إني 5 سنين بدور في ساقيتي … "شغل و حشيش و خمره و ستات "
- و الفلوس ؟!
- انت شايف فلوس ؟!
- لأ
- يبقي تخرس و تسيبني أكمل كلامي.
5 سنين من عمري راحوا فين !!!
بما إني فاضي اليومين دول … و واخد أجازه من كل حاجه … قلت أدور بقي علي الخمس سنين دول … يمكن ألاقيهم …
- دي بوادر توبه ؟!
- توبه !!! توبة مين يا راجل ؟!!
شويه كده و راجع تاني … بس بعد ما ارتب البيت من الداخل علي رأي اخوانا الفلسطينين.
و كعادة دماغي المرتبه … لازم أفصص الحاجه و بعدين أحللها عشان أمنطقها …
يبقي نشوف إيه اللي حصل واحده واحده … يلا بينا…
