مغامره جديده
النهارده اشتريت عربيه جديده …
أول مره أركب عربيه زيرو !!!
في واحد في الدنيا اللي رواها النيل … يدمر 3 عربيات في أربع سنين !!!
و مش أي تدمير … دا تدمير ثلاثي الأبعاد… تجار الخرده مكانوش بيرضوا ياخدوهم..
و التدمير دا مش للعربيه بس .. معدش عندي حاجه من الأطراف متكسرتش … و لما الأطراف خلصت دخلت علي الكتف .. عمرك شفت حد كتفه يتكسر !!! كسرت الترقوه… و عدت … بس برضه الموضوع دا ليه فوايد … يعني كل مره كنت أكسرلي إيد ولا رجل … أقعد في الجبس شهر ولا اتنين كنت بقضيها قرايه … ليها فايده برضه الكسور … و بعدين نطلع علي الراجل بتاع العلاج الطبيعي أقعد شهرين كمان .. و أقوم تاني زي الفل ..بس حاجه غريبه جداً … عمري ما كسرت حاجه ليها لازمه … يعني لو كنت كسرتلي عمود فقري ولا رقبه مش كنت خلصت و استريحت !!
سايق النهارده كأني أول مره في حياتي أسوق !!! خايف من كل حاجه و مرعوب من كل حاجه .. مشدود جداً و متوتر زي القطط.. و خايف علي العربيه و مرعوب علي نفسي !! كل قرار باخده بفتكر ألم الكسور و أحس بمكان كل كسر.
المفروض اني هروح أرخص بكره … بس لو كل مره هركب العربيه هتبقي كده … هبيعها .. مش ناقصه حرق دم.. يعني مشوار مياخدش 10 دقايق عدي كأنه سنتين و نازل غرقان في عرقي و بترعش …
باين عليا اتربتلي عقده !!! مع إن أخر حادثه مكانتش غلطتي. و بعدين بقالي أكتر من 8 شهور متشحطط في مواصلات و تاكاسيات خربت بيتي … و كله إلا المترو اللي كنت بضطر أركبه عشان مفيش بديل .. و لا الزحمه و وجع القلب ..
بس لو الموضوع دا استمر أكتر من أسبوع هبيعها … و أرجع للمواصلات تاني أرحم من العذاب ده..
