البنات عايزه إيه
عمرك سألت نفسك البنت دي بتحبه علي إيه ؟
عشان نجاوب علي السؤال ده يبقي لازم نعرف احنا بنتصرف علي أساس إيه … سيبك بقي من موضوع المنطق و الأخلاق و العقل و الدين و كل ده … كل دي جدران القفص اللي كل واحد مننا عايش جواه… لكن انت نفسك من جواة جوي قلبك عايز إيه ؟
انت عايز تعمل حاجات كتير بس مبتعملهاش عشان عيب أو حرام أو … أو …
كل ده بيعمل جواك صراع بين اللي انت عايزه و محتاجه و بين اللي المفروض تعمله… عمرك ما هتوصل للسلام الداخلي " الكلمه دي كبيره قوي كده ليه !!" غير لما يبقي في تناغم " resonance " بين اللي انت عايزه و اللي بتعمله مش اللي المفروض تعمله … مين اللي فرضه أصلاً … هتلاقيه القفص تاني " الدين ، أعراف المجتمع ، العائله ، الناس هتقول عليا إيه " عمرك ما هتتحرر و تخرج بره القفص غير لما تعمل اللي انت عايزه … ساعتها و ساعتها بس هتعرف انت محتاج إيه فعلاً.
احنا بشر و البشر من الثدييات … يعني احنا في الأخر بتتحكم في رغباتنا غرائز موجوده جوانا و منقدرش ننكرها .. أيوه الغرائز دي اتزوقت و اتلمعت تحت شعار الإنسانيه … لكن في الأخر احنا حيوانات مهما فسرنا تفسيرات و بررنا و اترافعنا عن سمو الجنس البشري.
من الأخر … أى بنت أو ست بتدور علي حاجه واحده بس … قائد القطيع … الـ " alpha male " لو بصينا لأي قطيع بقر كان أو أسود " جمع أسد " هتلاقي قائد القطيع هو اللي بيحصل علي أكبر عدد من الإناث… ليه ؟
في عالم الحيوان .. قائد القطيع بيتحدد بإنه أكثر الذكور قوه و دا معناه عندهم إنه أفضلهم … طيب في عالم البشر قائد القطيع بيتحدد ازاي ؟
المقاييس عندنا مختلف شويه لأننا بشر " مع الاعتذار للحيوانات لأن مفيش حيوان بيضحك علي نفسه و ينكر رغباته "
ليه البنات تلاقيهم منجذبين للراجل الواثق من نفسه ؟
ليه تلاقي الإناث عموماً منجذبين للراجل الناجح في شغله؟
ليه تلاقيهم منجذبين للراجل المسيطر؟
ليه بيعجبهم الراجل اللي ملهمش تأثير عليه؟
ليه بيعجبهم الراجل الذكي اللي بيقدر يخلي الناس تعمل اللي هو عايزه؟
مش لاقي أسباب … غير إن هو دا قائد القطيع اللي هما طول عمرهم بيدوروا عليه … و تعالوا نبص كده … أي بنت و هي في أوئل المراهقه فتي أحلامها مين ؟ هتلاقي فيه علي الأقل 3 أو 4 صفات من دول … حتي في الموروث الثقافي … نبص عند الأجانب " knight In shining armor " و " Prince charming " و للأسف احنا معندناش موروث ثقافي زي ده أو يمكن في و انا معرفش… البنت بعد ما بتشوف الحاجات دي تبتدي تشوف موضوع التوافق " compatibility " … و في كتير ميعرفوش هما انجذبوا للراجل دا ليه … سمعتها كتير " اتشديتلك معرفش ليه؟! " لكن دا عشان هن بيفكروا علي إنهم بشر و معتقدين إن لازم يكون ليها أسباب بشريه لكن الحقيقه " بالنسبه ليا " إنهم ميعرفوش نفسهم كفايه لدرجة إنهم يدركوا الحقيقه البسيطه دي… غرايزهم لوثتها المدنيه و الحضاره المزعومه … و هيأتلهم إننا 100% بشر !!!
هما بيدركوا إنه الراجل اللي قدامهم هو قائد القطيع لكن مش علي المستوي الواعي … دا حاجات جوه في الاوعي مقدرتش الحضاره تمحيها … لكن خليتنا نتعمي عنها.
أيوه دخلت الحضاره و غيرت مواصفات قائد القطيع …شويه … يعني مثلاً يكون عنده عربيه … يكون من المستوي الاجتماعي المعين … و هكذا لكن دا كله انعكاس لحاجات تانيه … ما هو معني ان عنده عربيه … يبقي معاه فلوس و هيقدر يوفرلها حاجات كتير … و دا دليل النهارده علي إنه ناجح و مسيطر… يعني في الأخر رجعنا للمربع رقم واحد.
انسان عادي
Comment by هشام صبري — September 27, 2006 @ 9:53 pm
يا سيدي الفاضل … حضرتك شايفني بقول إني سوبر مان ؟!!!
ما انا عارف إني إنسان عادي لدرجة الملل… يمكن شفت حاجات كتير .. يمكن جربت حاجات كتير … بس برضه عادي … كل حاجه عادي.
بس أكون شاكر أفضالك لو قلتلي إيه الأسباب اللي خلت ذهنك يتفتق و ينشرح و ينبسط و يتحفني بالحكم ده. ما هو ما ينفعش ترمي حكم زي ده و تمشي !!
Comment by karanysh — October 3, 2006 @ 8:48 pm
sout
Comment by sott — October 18, 2006 @ 3:34 am
“قائد القطيع” مش شايف ان التعبير فيه مبالغة شوية
مش دايما البنات بيجذبهم النموذج ده لان قائد القطيع النموذجي الي حضرتك ببتكلم عليه ده مبيمثلش ربع الرجالة الموجودين اساسا
بنات كتير اوي بيجذبها الراجل الهادي الحنين الغير مسيطر وبنات تانية بيعجبها يبقى مثقف وذكي ومش شرط ناجح ومسيطر ويملي اختياراتها عالاخرين
الحب ملوش تقسيم ولا شروط ولا مقومات
وزي ما قال عبد الرحيم منصور ” مفيش كسوف في المحبة ، ولا للمحبة شروط”
randa
Comment by الحياد لغة — March 21, 2007 @ 10:01 am
اما عن موضوعك .. فهو بالفعل صح بس طبعا معظم البنات كدا مش كلهم ….. وانا من ضمن البنات دي عشان كدا يمكن اعرف افسر شويه ليه كدا ….. بس طبعا ئبل ما اكلم لازم نئول انو مش هيكون قائد القطيع عشان احنا مش شويه غنم …. هيكون قائد البيت والاسره او الدوله الصغيره دي …… او بمعني اصح بلغتنا العاميه وعلي راي طنط امينه بتاعت قصر الشوق والسكريه سيدي وتاج راسي وسيد الرجاله وسيد الدنيا والناس كلها ….. ايوة محدش يستغرب اني بتمني انسان كدا …. يكون هو الاقوي ومش من السهل التاثير عليه ويكون واثق جدا في نفسه ومسيطر وكل حاجه …. بس مع دا كله ميخنئنيش ومحسسنيش اني جاريه عندو في البيت … لا يحسسني اني اميره في مملكتي وهو واحد من رعيتي وفي نفس الوئت الملك الحاكم بامره …. مش عرفه هتفهمو المعادله دي ولا لا…. بس هو كدا …. يمكن النظريه بتعتك دي صح عشان البنت او الست عموما قويه ويمكن اقوي من الراجل اصلا … الست دي اللي البنت اللي بتتحمل الالام جسديه ميئدرش الراجل علي تحمل نصها من حمل وولاده وما الي ذلك ….. الست ممكن تتحمل مسؤلية بيت واسرة في نفس الوئت في حاله وفاة زوجها او طلائها انما الراجل بيتجوز علي طول علشان ميعرفش يتحمل مسؤليه كبيره زي ما الست بتعمل وكمان ميعرفش ينجح فيها زي الستات …. الست دي هي الام وهي الاخت والزوجه والصديقه وفي نفس الوئت تئدر تكون الاب والاخ الكبير والعشيقه (في الحلال ائصد) وكمان الصديق …. فالمراه مخلوق وهمي في قدرته علي تحمل المصاعب … وطبعا اللي بيقوي القوه دي ويزدها صلابه التربيه .. ففي تربيه بتضعف البنت وتخليها تحس انها ولا حاجه وفي تربيه تديها ثقه في نفسها وبتعملها انها قويه …… يعني يارب تكونو فهمتو حاجه من كلامي او ياريت يعني اكون ادرت اوصل وجهة نظري …. يعني في الاخر يعني عيزه ائول ان المراه بتدور علي اللي اقوي منها …. ثقه وسيطره ونجاح وكل الصفات اللي تعمل راجل ناجح … تعمل قائد ورئيس دوله … الدوله اللي هيا البيت او الاسره طبعا ……. والسلام ختام
Comment by مروه — October 16, 2007 @ 9:16 am