مزيكا
طلعت الكمان … بعد شهر من دلوقتي … هيتم 8 سنين هجرته فيهم… مكنتش فاضيله … أو يمكن كنت خايف منه !!
المزيكا بتعمل في روحي حاجات كتير … أولها .. بتعرفني أنا حاسس بإيه دلوقتي و أنا بعزف … بتعري مشاعري و تكشفها … يمكن كنت خايف منه لأنه بـ يروي قلبي في الوقت اللي كان كل همي فيه إني أقتل قلبي ؟
مش عارف …
بعدت عنه و بطلت عزف … مع إن مفيش حد سمع عزفي غير لما قال عليه ممتاز … بس كانت مُدرسة الكمان دايماً تقولي " متخبيش مشاعرك انت عزفك ممتاز .. بس لو عملوا روبوت يعزف كمان هيعزف زيك بالظبط … عايزاك تعزف بمشاعرك مخبيها ليه؟!"
و دايماً مكنتش بعزف بمشاعري ولا بخرجها … خايف اتعري قدام الناس و الأخطر إني اتعري قدام نفسي… خايف حد يعرف في إيه جوايا… مش خايف الأصح مش عايز …
فرق كبير جداً انك تعزف و انك تسمع … و خصوصاً مع الوتريات… لما بتعزف أي آله وتريه غير البيانو .. بتحس بشده الوتر و بتحس بكل ذبذبه بتطلعها الأوتار … بتحرك عظامك … بتخترق روحك … بتعدي جوي كل مللي في جسمك … لما بتعزف بتعيش حاله من النيرفانا … و النشوه … قريبه جداً عندي من نشوة المخدرات … و أحياناً نشوة الجنس…
خرجت الكمان من علبته … صوابعي بترسم كل خط فيه من غير ما تلمسه … بتعدي في بطء مدروس علي كل إنحناءة فيه … و كأني أداعبه قبل الجماع… من غير ما ألمسه يادوب الهوا اللي بتحركه صوابعي بيعدي عليه … أشفقت عليه من طول الهجر و الإهمال … و خصوصاً إنه من غير أوتار …
طلعت الأوتار من علبها و ابتديت أشدها وتر وتر … بكل حنيه و رقه … و كأني بدأت العزف …
من غير ما أحس خلصت شد الأوتار و كأني مغيب … و حسيت بوادر انتصاب !!!
مسكت القوس و صوابعي خايفه تكون نسيت … نسيت أماكن النغمات … خدت وضعية العزف و بدأت أجرب الأوتار … نشوه جديده ابتدت تتسحب و تغمرني … نشوه قديمه بس من سنين محستهاش…
بكل الصبر اللي عندي واصلت عملية الدوزنه" tuning "… و حاربت القذف المبكر للعزف..
و أخيراً ابتديت أعزف … بس هعزف إيه ؟!!..
قعدت أفكر لحد ما فشلت في اختيار حاجه… و قررت إني أسيب صوابعي تعزف… أكيد فاكره أكتر الألحان اللي بحبها … يمكن عشانها كتير ؟ معرفتش أختار … يعني بحب تشايكوفسكي و موزارت و رحمانينوف … و أطرب من أم كلثوم … و اتبسط و أنا بسمع الروك و البوب و R&B … أحب أسمع Evanescence و احب أسمع سيناترا و إلفيس!! و ألاقي نفسي عايش مع فيروز … و كذا مره أظبط نفسي حاسس كلام منير.. غريب قوي زوقي في المزيكا!!!
صوابعي ابتدت تتحرك و العزف طلع كأنه باب محتاج تزييت بس واصلت و ابتدت النغمات يبقي ليها معني .. عمرك دقت المزيكا … عمرك حسيت بالدفا أو البرد طالع من المزيكا ؟
ابتديت أعزف و لقيت اللحن فرايحي … عزفت جزء من باليه كسارة البندق لتشايكوفسكي … Dance of the reed pipes .. لحن من بره فرايحي لكن من جوه فيه حزن و شجن … و عزفت و عزفت و الثانيه بتعدي سنين… عايز أروي العطش اللي قاتل قلبي … عايز قلبي يبعث من قبره …
و في وسط العزف لقيت صوابعي بتغير اللحن لوحدها … غيرت لحاجه تانيه لتشايكوفسكي برضه … " Souvenir de Florence Op. 70: Adagio cantabile e con moto" … ياااااااااااااااااههههههههههه … قد إيه اللحن دا مؤلم … قد إيه الكمان بيتألم و يتوجع من غير صريخ … ألم مكتوم يوجع الصخر… كل الألم دا جوايا !!! طيب و ليه كل الألم دا جوايا؟! لازم أعرف..
عزفت و عزفت و عزفت و عدت ساعات و أنا بعزف … و مفيش حاجه سامعها غير الألم …
قد إيه كان واحشني …
