تداعيات بعد الرحيل
كفرت بهن جميعاً …
و شهدت أنك وحدك..
لا شريك لك وحدك
لا شريك لك
رحلت … و تركت ورائها فراغ … فراغ فلكي … فراغ لا تملؤه الكواكب..
يقولون إننا لا ندرك قيمة الشيء إلا بعد فقدانه … لكني كنت أدرك قيمته و هو معي .. كنت أدرك و تلك هي المشكله .. أنني كنت أعلم ما سأفقد قبل أن أفقده!!
عارف لما تاكل مانجايه حلوه قوي و تخلص ؟… تقعد تاخد مانجايه مانجايه بعدها يمكن تلاقي واحده في حلاوتها و بعد ما تخلص 20 كيلو مانجه متفقش غير علي المغص و الإحباط .. إنك ملقيتش زيها !!
لحد ما تفقد كل الأمل .. يمكن مفيش زيها أصلاً.. أكيد في بس انت لسه ملقيتهاش..
قعدنا فتره نتكلم و نتقابل علي النت و هي عارفه اني مع غيرها … و ساعات كانت بتكلمني و انا مع غيرها و بتبقي حاسه … و ألمها في قلبي موجود… بس هي عارفاني… و عارفه قبل ما تسافر ان دا هيحصل … إذا كنا و احنا في الأول كانت بتبقي عارفه و حاسه إني مع واحده تانيه ولا كانت بتكلمني!!! لحد ما لوحدي و من غير ما تطلب قطعت كل حاجه … يمكن كانت واثقه إن دا هيحصل ؟!
لحد ما مره واحده غابت !!!
طلبت مامتها … قالتلي إنها حصلتلها حادثة و ماتت…
مع إني دفنت كل عيلتي تقريباً … إلا إن جنازتها كانت أول جنازه أعيط فيها بحرقه … عمري ما بكيت في جنازة حتي جنازة والدي … عيط بعد ما العزا خلص و بقيت لوحدي … لكن في جنازتها … مقدرتش.
قعدت فتره كبيره بعد كده متأثر بفراقها … لكن الدنيا مبتقفش عشان حد … فضلت أشتغل أكتر من الأول و حققت نجاحات و قفزات نوعيه في شغلي مع حفاظي علي الهلس و التهجيص… زي ما بيقولوا كده "work hard.. Play harder" كنت بشتغل بافترا و بهجص بزمه أكتر مما بشتغل و كل حاجه و ليها وقتها… المهم اللحظه متعديش .. غير لما أحقق أكبر استفاده منها.
و رجعت ألعن من الأول … زي ما واحد يبطل سجاير يرجع يشرب أكتر من الأول… عطش مفيش حاجه بترويه .. لأن اللي كان بينا صعب أوي يكون بيني و بين واحده تانيه.
