قالولي بتحب مصر ؟!
قالوليْ بتحب مصر، قُلت مش عارف ( تميم البرغوثى – قالولي بتحب مصر ) القاهرة و الإسكندرية دول بقي حدوته تانيه خالص…
المعنى كَعْبَةْ و انا بوفد الحُرُوفْ طايف
وأَلْف مَغْزَل قَصَايد في الإِدينْ لافِف
قالوليْ بتحب مصر، قُلت مِش عارف
أَنَاْ لماَّ أْشوفْ " مَصر " عَ الصَّفْحَة بَكُون خايف
أسوان و الأقصر و أسيوط و المنيا و سوهاج و سيوة و الفرافرة و مرسي مطروح و أكتر من مكان في الساحل الشمالي … المنزلة و المنصورة و كفر الشيخ و طنطا و منية شنتشنا عياش " جنب طنطا.. المكروباصات بتنده عياش عياش و فيها مركز شباب منية شنتشنا عياش المِطَوَر " .. الزقازيق و دمياط و بورسعيد و الإسماعيليه… العريش و رفح و طابا.. الطور و شرم الشيخ و دهب.. و خيمنا علي الجبل في مرسي علم و الغردقه.. طلعت أعلي جبل في مصر " جبل الشيخ "… و عديت علي أوطي نقطة في منخفض القطاره في الفيوم.
المكان مش مهم … مع إن في أماكن في مصر مفيش أجمل منها في الدنيا … بس مصر ليها طبيعة خاصة و الصحرا هنا غير أي صحرا … الملفت إن الصحرا الغربية بطبيعتها الرملية حكاية .. و الصحرا الشرقية بطبيعتها الصخرية حكاية تانيه خالص.. الأهم من الأماكن هو البشر و طباعهم و طريقة معيشتهم و أولوياتهم في الحياة.
ممكن أحكي علي كل مكان من دول بالساعات … ممكن أعملها كل فتره أحكي علي مكان.
نبتدي بالقاهره..
أنا عارف شوارع القاهرة بالسنتي.. طيب ما أنت عارف شوارع
Warwick بالسنتي برضه ؟!
في فرق القاهرة بحس إن فيها حته مني شبهي و أنا شبهها.. في فوضتها و لخبطتها و توهانها .. في أماكن في القاهرة بحب أكون موجود فيها و أماكن برتاح لما أكون موجود فيها… أكتر حي بحبه في القاهره .. الزمالك .. في عشق خاص بيني و بين شوارع الزمالك .. بعديه يجي المعادي.. مدينة نصر عمري ما برتاح فيها !! الجيزة زحمة زيادة عن اللزوم … المهندسين فيها تركيبة غريبة و غير متجانسة من البشر و نفس الكلام حالياً عن الدقي و العجوزة … تصدق بقي إن أكتر مكان بحبه في الجيزة هو الكيت كات!! مفيش فيه حد بيتظاهر بغير حقيقته!!
إزاي بجمع بين تناقضات القاهرة كلها و بحب تناقضتها !!
ممكن تلاقيني بتعشي نيفه عند الرفاعي في ميدان السيدة أو فته عند الركيب و بعديها سوبيا مززه عند الرحماني الساعه 5 الفجر و ممكن تلاقيني في مريديان هليوبوليس بتعشي Bavette au Porto مع Flan de Courgettesو الحلو Clafoutis aux Pêches et aux Framboises .. من غير مناسبة بحب السيده جداً .. مش بحبها.. لأ .. بعشقها.
كل دا كوم و وسط البلد كوم تاني…
مفيش حاجه توصف حالة تنميل الدماغ اللي بكون فيها و أنا ماشي في شوارع وسط البلد من شارع عرابي و التوفيقية لحد ميدان التحرير و شارع معروف… عارف أنضف أماكن في وسط البلد و مزابلها عارف كل البارات اللي فيها و كل المطاعم و الكافيهات الخمس نجوم و الأربعه و التلاته كمان.. لحد القهاوي البلدي !! مفيش قهوه بلدي في وسط البلد مقعدتش عليها من أول أم كلثوم لحد القهوة اللي في ضهر بيتزا هت اللي في ميدان التحرير !! في ملحوظه مش عارف أقول عليها إيه بس كل ما تدني مستوي القهوه الشيشة بتبقي أحسن في مصر كلها مش القاهرة بس .. يمكن عشان الحجر بيكون قديم !! القهوة اللي قدام الجامعة الأمريكية فاكر شربت عليها من فترة كوباية شاي بـ 30 قرش و حجر معسل بـ 25 قرش بس كان حكاية !!! الكلام دا مش من زمان قوي .. قبل موضوع جنان الدولار دا بشويه. و لما يكون القهوجي صعيدي بيعمل أجمل كوباية شاي.
الإسكندرية بقي حكاية برضه…
عارفها كويس بس مش زي القاهرة طبعاً .. عارفها من أول الحضرة لحد المنتزه و المندرة..
بعشقها برضه … بس بحبها في الشتا أكتر … بكره العجمي و المعمورة … بعيد عن الصيف و سماجة و غلاسة المصيفيين بتكون رائعة تخطف الأنفاس و تنافس مرسيليا .. في الجمال .. أهلها بقي طبعهم جميل و رايقين و معاملتهم قمة في الزوق علي عكس سكان القاهرة … يمكن الزحمة و غابات الخرسانة ليها تأثير !
الموضوع و ما فيه إن مش المكان هو اللي بتحبه … الناس اللي عايشين فيه هما اللي روحهم بتتسربلك و تأثر فيك و تديك انطباع المكان.. كل مكان بروحه بيعلم في قلبي… يمكن عشان كده أكتر مدنتين كرهتهم هما لندن و برلين ؟! مدن أموات مفيهاش روح ..
برضه موصلتش لإجابة علي السؤال!!
أَصْلِ المَحَبَّة بسيطه و مصر تركِيبَة
و مصر حِلْوَة، وِ مُرَّة، و شِرْحَة، و كَئيبَة
دَةْ اْنا اْخْتِصِر مَنْصِبِ الشَّمس و أقول شَمْعَة
ولا اختِصِر مصر وَ اَنْدَه مصر يا حَبِيْبَة!
******
يا أهل مصر اسمعوني، و الكلامْ أَماناتْ
قلتولي بِتْحِبّ مصر، قُلت مِش عارفْ
روحوا اسألوا مصر هِيَّة عَنْدَها الإجاباتْ
( تميم البرغوثى – قالولي بتحب مصر )
مسمعتش عن تميم البرغوثي قبل كده, ألاقيه فين؟
تحياتي للدماغ
Comment by آسر — September 17, 2006 @ 1:05 am
مسمعتش عن تميم البرغوثي, ألاقيه فين؟
تحياتي للدماغ
Comment by آسر — September 17, 2006 @ 1:06 am
تلاقيه في مكتبة الشروق في ميدان طلعت حرب… هتلاقيه في الكتب اللي علي السلم.. تاني مربع من علي الشمال علي بسطة السلم.
و شكراً علي التحية
Comment by karanysh — October 3, 2006 @ 8:40 pm
هوا فيه حد لسه بيحب مصر
تبقي موقفتش في طابور عيش ولا ركبت أتوبيس
ولادورت علي عمل بعد ما اتخرجت ولاروحت ولاجيت سامحني يارب
Comment by MOHAMED — December 11, 2006 @ 10:18 pm