اتلهى

البدايات الجديدة دايماً بتيجي معاها آمال التغيير.. لكن إن التغيير يحصل فعلاً … دا موضوع تاني خالص .. المشكلة مش في التغيير نفسه .. المشكله لما يتسلط عليك أمل نجاح التغيير.. في فقدان الأمل راحه أو عذاب ..

 Abandon every hope, ye who enter here

مكتوبة علي باب جحيم دانتي!!

 فهل فقدان الأمل يشكل نوع من الراحه ؟! يمكن عشان معدتش مستني التغيير فـ بتتعلم تتعايش مع  الوضع القائم .. يمكن عشان معندتش مستني حاجه .. مبيحصلكش إحساس الخيبة لما ما تحصلش ؟!

 ولا عذاب إنك هتفضل في الوضع القائم  .. بس ميبقاش عذاب غير لما تكون مش راضي عن الوضع القائم .. لكن لما توصل لمرحلة من التشبع و الرضا … يبقي فقدان الأمل هو كل الراحة.. لما تتعود علي الألم فتره طويله معندتش بتحس بيه.. طالما مش بيزيد أو بيتغير .. أي موثر ثابت بيستمر فتره كبيره بيدخل في دايرة الاشعور .. لو سمعت صوت مزعج في البداية لكن مستمر و قعدت فيه فتره طويلة معدتش بتسمعه .. لو رحت مكان ريحته وحشه هتاخد بالك في الأول لكن لو قعدت فتره في المكان ده معدتش هتشم الريحه دي.. احنا كبشر عايشين حاله من فوضي الحواس .. حواسنا نفسها بتخدعنا .. خيانه لعقلنا طالعه من أقرب ما فينا " حواسنا " نفسها .. لكن لما بتتعلم تروض حواسك و تخدعها .. بتحس باللي انت عايز تحس بيه وقت ما انت عايز .. و برضه مبتحسش باللي انت مش عايز تحس بيه لو عايز.

ما علينا ..
بقالي شهر تقريباً من ساعة ما رجعت من الساحل مشربتش حشيش .. ليه ؟! مش عايز .. أو مش محتاجه .. في نهاية الإسبوع اتنين اصحابي جولي .. و معاهم كمية ضخمة .. و بما إني خبير اللف العالمي .. جايين طبعاً عشان نشرب و يعملوا معايا واجب بما إن خيري مغرقهم .. و خيري سابق عليهم ..
قاعدين كالعادة و بلف .. الغريب في موضوع اللف دا إنك من كتر ما بتعمله بيبقي حاجه تلقائية .. زي ما تتعلم تركب عجل .. عمرك ما بتنساه.. قاعد بلف و دماغي مش معاهم خالص .. دماغي لسه في موضوع الحساب و الخمس سنين اللي راحوا .. و ابتدت بعض النتايج تتبلور و بصيغها بصورة شبه مفهومه..
أول جوينت طلع و افتتح واحد فيهم الليلة .. و أنا قاعد بلف زي المكنه زي ما بعمل كل حاجه في حياتي .. لحد ما الجوينت الظريف وصل عندي…

لأ .. اشربوا انتوا ..

إزاي و ليه و الحواديت و مينفعش و كده هتبوظ الليلة ..
لكن كل عِند الدنيا ركبني و مش هشرب يعني مش هشرب.. و عشان طبعي مش كداب .. غريبه قوي .. ازاي مبكدبش؟! .. هو انت مش بتكدب .. انت بتخبي أجزاء من الحقيقة .. و ساعات بتقول كلام يتفهم بأكتر من معني و انت عارف اللي قدامك هيفهمه علي غير الحقيقة .. أو بتقول كلام مش مفهوم و بتسحب اللي قدامك عشان يفهمه بطريقه معينه أو يستنتج منه حاجه معينه غير الحقيقة.. يبقي انت كده مش كداب .. انت كده مُضَلِل بس.
عشان مبكدبش .. أخدتهم في طريق فهموا فيه إني مسطول أصلاً و مقدرش أعلي عن كده … مع إني بقالي شهر تقريباً مشفتوش حتي!!
ليه رفضت ؟!
يمكن عشان معدش ليه معني .. أو معدش ليه طعم أو بيسبب متعه .. يمكن كنت بسكن ألم الحياة بالغياب عن الوعي و تنميل الدماغ .. بس دلوقتي معندتش محتاج مسكنات .. دلوقتي مستقبلات الألم في خلايا مخي اتحرقت و معدتش بحس بيه!! احتمال وارد برضه يكون حصلها short circuit و ضربت خلاص.

- ازاي بتتغير؟!
- مش عارف .. بس السؤال الأهم " ليه بتتغير ؟"
- مش عارف!! باين عليا معدتش فاهم حاجه!!