رمضان كريم
كل سنة و انت طيب…
أطلب كل أصحابي و معارفي قبل رمضان عشان أقول لكل واحد فيهم .. كل سنه و انت طيب ..
و يبتدي الشهر زي كل سنه … مش عارف ليه الناس بتدي بعض الشعائر الدينية أكتر من حقها … يمكن عشان مش متعودين ؟! يعني مثلاً لما تقضي رمضان بره مصر .. هتحس ليه طعم أحلي … كل الحكايه هناك إن كل واحد في شغله و كأن مفيش أي مشكله ولا حد بيكسل بحجة إنه صايم ولا حد بيبطل شغل.. قبل المغرب بدقايق تلاقي الجامع اتملي بعائلات مسلمه كتير … و نكسر الصيام مع الأدان بأي حاجه " تمر و مياه مثلاً" و بعد الصلاة نفطر كلنا مع بعض .. و نفضل قاعدين في الجامع لحد صلاة العشاء و بعديها التروايح و هكذا لحد ما نخلص صلاة بدري و كل واحد يروح ينام عشان هيصحي بكره بدري .. ولا حد قال إن الدنيا صيام ولا حاجه اختلفت …
هنا بقي تلاقي الناس عيشتها اتغيرت و نفسيتها اتغيرت " لأسوأ ما يكون " و الدنيا كلها اتلخبطت و باظت .. و كل دا بحجه إن الدنيا صيام .. هو انتوا عيال صغيره ؟!! فيها إيه لو مفطرتش في البيت ؟!!! أو لو فطرت متأخر نص ساعة ؟!!! مش هتموت … مش محتاج أتكلم .. أنا بس بيجيلي قرف من الناس اللي بتغلط بحجة الصيام .. حالة الفوضي و الزحمة اللي الناس بتعملها بحجة الصيام.. اللي أعرفه و شفته .. مش هو دا الصيام.
برغم كل حاجه عملتها إلا رمضان … رمضان … ليه قدسية مقدرتش أكسرها لحد دلوقتي .. سواء في مصر أو بره مصر … بالرغم من إنك ممكن متصومش عادي جداً … بره مصر مفيهاش مشكله و في مصر برضه لو عديت علي التابعي مثلاً ممكن تفطر و تقعد في جروبي تاخد القهوة مع السيجارة .. في أسهل من كده؟! .. لكن لو عدي عليا رمضان .. تلاقيني اعتزلت كل حاجه … و بما إني مقضيها اعتزال بقالي شهر .. يبقي بعد رمضان يبقوا شهرين.
و تستمر الهدنه " من غير نقطة في أخر السطر "
