اتلهى

بعض النزاعَّات قد تستمر عمر بكاملة ولا تستطيع أن تنهيها.. و خاصة عندما تكون أنثي طرف في النزاع.. 
اعتدت التعامل مع أقوي سيدتين قابلتهما في حياتك.. جدتك .. و أمك.. القوة هنا تعني قوة داخلية .. فالقوي هو من يتحمل الصدمات.. و يلملم نفسه .. ليستمر.. هو من لا يكسره الفشل ..   بل ينهض و يحاول مجدداً.. من يعرف ماذا يريد و كيف يحققه.. قد يحارب الدنيا كلها فقط لقناعته بأنه علي حق .. أن يختار أن يخسر أغلي الأشياء و الناس .. إذا وقفوا في طريق حصوله علي ما يعتقد أنه حقه و يريده.. من يسعي لتحقيق ما يريد ولو استغرقه سنوات طوال.. و في النهايه يحقق كل أهدافه..

شخصية ذات نفوذ "معنوي و نفسي " و ذات تأثير ضخم فيمن حولها مثل أمك .. أضف إلي ذلك كونها متسلطة و أحياناً مستبدة.. لا يعني ذلك أنك لا تحبها .. لكنك بطبيعتك المتمردة .. ترفض السلطة و القيود و الأعراف إذا ما وقفت في طريق ما تعتقد أنه حقك.. كنت دائم الصراع معها .. أحياناً علي أمور صغيرة و أحياناً في قرارات مصيرية..

فجأة و بدون مقدمات و أثناء نزاع معتاد.. علي أمر صغير.. تراها ترفع راية بيضاء… و تسلم لما تخالفه!!!!

تربكك المفاجأة.. هل انكسرت حقاً !!!!

هل استسلمت فعلاً !!!

انتصرت في معركة أم الحرب!!

هدنة أم اتفاق سلام !!

الغريب في الأمر أنك حزنت..

هل كسرتها الحياة ؟!!

هل أخيراً اقتنعت بضعفها و سنها؟!!

ها انكسرت أمامك أم أمام الدنيا كلها؟!!

هل سعيت لشيء فترة طويلة جداً .. و عندما تحقق أحسست أنك خسرت ؟!
هذا بالتحديد ما حدث ..
عندما حكيت لأختي قالت .. "أنت حزين لأنك كنت تستمد جزءً من قوتك منها و من قوتها… و تخاف أن تضعف أنت إن هي ضعفت."

هل فعلاً سبب حزنك شخصي لهذه الدرجة .. أم أنت حزين عليها هي؟!!

مش عايز أكتب حاجه .. مش عايز اتكلم.. مش عايز حتي أفكر أو أحلل و امنطق الأمور كالعادة.. مش عايز أحاسب نفسي ولا أسألها..

لكن لما يسيطر عليك الإحساس ده يبقي أنت في أشد الاحتياج انك تكتب!!

ظاهرة جديده .. المناسبات السعيده بقت بتسببلك حزن يقترب من الاكتئاب !!!
يمكن الإسبوع ده حاله خاصه عشان كده لاحظته؟!
يمكن عشان في أسبوع واحد حضرت مناسبتين ..
في أول الإسبوع حضرت عماد طفل سمي تيمناً بك؟!! زرت عائلة تشعر أنك لا تنتمي إليها.. زرت أماكن تحمل الكثير من الذكريات .. لكنك أيضاً لا تنتمي إليها.. التأثير .. حزن عام ؟!!
النهارده كنت في فرح واحد من أصحابك.. مراته كانت زميلتك في يوم من الأيام و يمكن تعرفها أكتر منه … مبسوط إنهم اتجوزوا..
لما قعدت لوحدك.. لقيت نفسك زعلان و تقريباً مكتئب.. بقالك سنه تقريباً المناسبات التي بيقولوا عليها سعيده بتسببلك اكتئاب!! بس المره دى خبطتين في الراس توجع..

أكيد مش حسد ولا حقد.. بس ليه بتزعل بسبب المناسبات دي .. مع انك بتبقي فرحان لأصحابها زي ما تكون مناسبتك إنت!!!
دخلنا في موسم الأفراح و اتعزمت علي فرحين الشهر الجاي.. ليه مش عايز تروح؟!!

- إنت مش ملاحظ إن بقالك فتره بتسأل نفسك أسئله كتير و مبتجاوبهاش؟!!
- سيبني في حالي الله يخليك……

أحبب من شئت… فإنك مفارقه.

بعض الأحداث تدفعك أحياناً إلي التساؤل…
تتسائل.. عن نفسك.. وما يعنيه وجودك عند البعض.. قد لا تشعر بهم.. لكنهم يريدونك.. بعيداً عن المصلحة .. وجودك أنت.. خالصاً من أي تشابك.. أنت فقط بدون خيوط رابطه "  just you..No strings attached " …

تدعوني لحضور عماد وليدها … هناك.. تلح.. مازلت متردد.. تترك الباب مفتوحاً .. غالباً ستذهب.

للمرة الثانية في أقل من ستة شهور يأتيك عرض وظيفة.. أفضل من التي تشغلها حالياً… تذهب .. و كلما رفضت جعلوا العرض أفضل مادياً.. لا يعلمون أن رفضك له أسباب أخري غير العرض.. أنت تريد أن تحس الاستقرار.. ولو لفترة قصيرة.. برغم حبك للتغيير.. إلا أنك أصبحت تكرهه و تخشاه.. لم يعد لديك تلك القدرة الفائقة علي التكيف.. تريد أن تقف.. بعد سنوات من الجري.. أعتقد أنك تعبت.. إنك فقط تريد بعض الوقت المستقطع. لتستريح.. ثم ستواصل العدو مرة أخري.. أنت تكره الثبات .. الثبات يولد عندك الملل.. تريد وقفة لتلتقط أنفاسك ليس أكثر..

هذا أيضاً يجعلك تتسائل.. بينما يشكوا الناس من قلة فرص العمل.. تجد أنت العديد منها.. هناك أسباب تدركها لكنك تراها عادية.. ليس هناك ما يميزك .. لكن الأخرين لهم أراء أخري…

جدتي نصحتني منذ زمن بعيد..
Do what you do best, better than anyone else, and keep on doing it
أعتقد أن هذا هو السبب.. فتلك صفة أصيلة فيك و ليست مهارة مكتسبة.. ثم هناك تلك الملاحظة..
Not only you work smart, you work very hard as well

ليس سهلاً أن تحصل علي تلك الفرص.. و ليس سهلاً أن تكون في موقعك هذا.. فكلاهما يتطلبان الكثير من العرق و الأرق و قليلاً من الموهبة.. فالموهبة وحدها لا تصنع شيئاً.. قابلت أناس أفضل مني بمراحل لكنهم لا يحصلون علي الفرص التي تأتيني صاغرة.. بعضهم لا يبذل ما يكفي من الجهد… و بعضهم لا يقوي علي بذل جهد كبير لفترات طويلة..  و بعضهم يري أنه يمكن أن يحصد دون أدني جهد..

كثيراً ما أكون موضع حسد .. بسبب ذلك .. لكن ما لا يدركه أحد هو ماذا خسرت و ما يتطلبه أن تكون في مكاني.. لا يعرفون الثمن الذي تدفعه للحصول علي كل ذلك.. بينما تعلم أنت و تدفعه بكل رضي.

النساء المصريات علي اختلاف فئاتهم العمرية .. و الاجتماعية .. و المادية بينهم عوامل مشتركه كتير.. القصه مش في الكبار .. خلينا في بنات جيلنا.. البنات من عمر 20 لحد 35 .. دول بقي قصة كبيرة .. أكبر عامل مشترك بينهم .. و بالتحديد في فئات المتوسطه فما فوق .. معظمهم عندهم أزمة هوية.. البنت من دول تبقي عايزة تعيش عيشة البنت الأوروبيه و في نفس الوقت تفضل فيها الطبع المصرى و الشرقي غلاب ..
عايزه تعيش عيشة أوروبا من ناحية و تنسي نواحي تانيه .. عايزه تصاحب و تعرف .. و تنسي انها مش مستقله عشان تقدر تعمل كل ده .. عايزه تعيش وسط عيله و في نفس الوقت تعمل اللي هي عايزاه !!!
انك تعمل اللي انت عايزه دا حاجه مكتسبه .. لما تبقي مستقل ليك بيت بتاعك لوحدك .. بتقدر تصرف علي نفسك بتحتاج من عيلتك دعم معنوي أكتر من أي حاجه ساعتها تقدر تعمل اللي انت عايزه .. عشان ساعتها بس تبقي انت مسئول عن نفسك و عن تصرفاتك .. و بتبقي نفسك هي الحاجه الوحيده اللي بتحكمك و تقدر تمنعك .. مش تبقي بتكلمي صاحبك .. و أول ما اخوكي أو أبوكي يدخل عليكي توقليله هكلِمك بعدين أو تكملي الحوار علي إنك بتكلمي واحده.. كده تبقي بتسرقي … احساسك انك خايفه لأنك بتعملي حاجه غلط سببه انك فعلاً بتعملي حاجه غلط.. كام واحد مصاحبه النهارده تقدر تبات مع صاحبها؟!!
غير دا كله معظم البنات بيصاحبوا بهدف  الجواز !!! أو ألعن … بتصاحب عشان تلاقي واحد يصرف عليها و يخرجها و يعزمها و يدلعها .. سيبك من إنه بيصرف عليها من جيبه أو من جيب أبوه متفرقش .. بس الشاب من دول مبيصرفش عليها عشان يبقي اسمه مصاحب … الشاب مننا لما بيصرف علي واحده بيبقي مستني انها ترد له الفلوس اللي دفعها بطرق تانيه.. دعارة متنكره يعني .. تيجي البنت من دول و تجيب ورا ساعة الجد و تقولك انا بنت.. معملش الكلام ده !!و ممكن لو طلعت كريمه شويه تضحك عليه ببوستين في السريع..  ساعتها الواد مننا يحس انه اتضحك عليه .. عشان كده يفرق معاهم قوي العربيه اللي راكبها و نوع السجاير اللي بيشربها .. مقاييس مبدئية .. البغل هيقدر يصرف عليها ولا لأ ..

أنا مش بتكلم عن تجربه شخصيه بس دي شوية ملاحظات بسيطة..
أمي عندها مبدأ .. كنت بقول أنه مبدأ طبقي .. لكن كل شويه بيبان أنه صح.. كانت بتقولي .. صاحب اللي زيك صبيان أو بنات.. سألتها يعني إيه.. قالتلي يعني يبقوا ناس زينا..
طلع الكلام دا مظبوط.. اللي زيك مش هيغير منك.. لأنه ببساطه عنده كل اللي عندك و يمكن أكتر..و غالباً مش هيبقي عايز منك حاجه..

إنت قاسي قوي…

إنت حنين قوي ….

إنت أهبل يا ابني .. إيه العربيه اللي انت جايبها دي .. و بعدين إنت عمرك ما ركبت عربيه مانيوال !!!

إنت مش حاسس انك كبرت .. لازم تاخد خطوه ناحية الجوز و تعمل بيت…

إنت مش عارف لما سبتني عملت فيا إيه؟!! قلتلك متسيبنيش في الفتره دي .. و مفهمتش ..

إنت جريء قوي ..

إنت كمان معندكش دم..

إنت هتفضل مقضيها كده لحد امتي .. فوق بقي …

إنت بتضيع وقتك.. مش هتفهم حاجه من اللي انت بتعمله دا..

إنت كبير قوي.. لما بتنزل لمستوي بعض الناس بيفتكروك صغير.. إنت كبير .. خليك كبير علي الكل..

إنت سوسه ..

إنت فاهمني أكتر من نفسي…

إنت مش من هنا ولا من هناك .. لا عمرك هتستريح هنا .. و لا هتستريح هناك.. خليك في البلد اللي انت بتستريح فيها أكتر و حاول تتأقلم..

إنت عارف انت عايز إيه كويس قوي..

إنت تقدر تعمل إي حاجه انت عايزها..

في ناس تقول حاضر و ناس تعمل اللي هي عايزاه .. إنت من الناس اللي بتعمل اللي هي عايزاه.. بس عندك انضباط و التزام بيمنعوك من المرقعه…

إنت مش محتاج تشتغل .. لكن بتشتغل عشان بتحب اللي انت بتعمله.. مش فاهم ليه بتموت نفسك في الشغل كده .. إياكش تولع.. انت بتهرب من حاجه ؟؟!! ولا بتبدل إدمان بإدمان من نوع تاني؟!!

إنت دايماً عارف انت فين بالظبط.. و حجمك قد إيه..

إنت عمرك ما حبتني..

إنت دايماً عارف انا بفكر في إيه و عايزه إيه .. بس ساعات كتير بتعمل عبيط!!!

إنت عمرك ما بطلت تحبها لحظه واحده..

إنت دايماً تبص للحاجه اللي موجوده و تشوف فيها ألف حاجه مش موجوده و ممكن تكونها..

إنت فاهم غلط.. مفيش حاجه بتحصل من غير سبب..

إنت أناني قوي…

عندما تفكر قليلاً .. تجد أنك تعتمد علي مجموعة من البشر .. و هم أيضاً يعتمدون عليك .. إذا غابوا .. ستعم بعض الفوضي أحد جوانب حياتك .. إلي أن تستبدلهم .. أما إذا غبت أنت فستتوقف حياتهم لبعض الوقت ثم يستمروا .. يحترمونك .. و يعاملونك معاملة السيد .. فقبل كل شيء .. حياتهم تعتمد عليك.. أما أن يحبوك !! .. نفس الفارق بين أن يعاملك نادل المقهي معاملة أفضل بقليل مما يعامل باقي الزبائن بطريقته الرائعة.. ليس لأنك تعطيه بقشيشاً كبيراً كل يوم .. و لكنه يحبك بالفعل..

أناس مثل عم محسن المسؤل عن السيارات التي تركن في شارعنا.. سيد البواب .. أم أيمن التي تنظف البيت كل يومين.. أم أيمن في حد ذاتها قصة .. هي الوحيدة التي لديها نسخة من المفتاح !!
عم فتحي صاحب كشك السجاير علي ناصية الشارع .. و محمد أخوه الذي يقف في الكشك بالليل.. عم إسماعيل الجنايني / الغفير .. نُدل المقهي وردية الصباح و وردية المساء ..
تراهم كل يوم !! تتعامل معهم كل يوم .. و هناك من لا يقومون علي خدمتك لكنهم يصبحون بشكل أو بأخر من الثوابت ..شخص تقول له صباح الخير كل يوم.. و أحياناً مساء الخير.. و أنت عائد ..

تنزل من بيتك يوماً فلا تجده .. تسأل .. يأتيك الرد .. قتلوه البارحة !!!!!!

فراغ كبير يعتلي وجهك .. و عقلك .. لا تستوعب .. لا تفهم الأسباب .. إحساس الفقد يغمرك .. برغم أنك لم تكن تعتمد عليه و لم يكن يعتمد عليك .. لكنه أصبح من الثوابت .. مثل أم أيمن و نُدل المقهي..

في اليوم التالي .. تخرج إلي الشارع .. تنظر إلي مكانه الفارغ .. و تقول …

صباح الخير ….