اتلهى

July 7, 2007

البنت مصريه

Filed under: شخابيط

النساء المصريات علي اختلاف فئاتهم العمرية .. و الاجتماعية .. و المادية بينهم عوامل مشتركه كتير.. القصه مش في الكبار .. خلينا في بنات جيلنا.. البنات من عمر 20 لحد 35 .. دول بقي قصة كبيرة .. أكبر عامل مشترك بينهم .. و بالتحديد في فئات المتوسطه فما فوق .. معظمهم عندهم أزمة هوية.. البنت من دول تبقي عايزة تعيش عيشة البنت الأوروبيه و في نفس الوقت تفضل فيها الطبع المصرى و الشرقي غلاب ..
عايزه تعيش عيشة أوروبا من ناحية و تنسي نواحي تانيه .. عايزه تصاحب و تعرف .. و تنسي انها مش مستقله عشان تقدر تعمل كل ده .. عايزه تعيش وسط عيله و في نفس الوقت تعمل اللي هي عايزاه !!!
انك تعمل اللي انت عايزه دا حاجه مكتسبه .. لما تبقي مستقل ليك بيت بتاعك لوحدك .. بتقدر تصرف علي نفسك بتحتاج من عيلتك دعم معنوي أكتر من أي حاجه ساعتها تقدر تعمل اللي انت عايزه .. عشان ساعتها بس تبقي انت مسئول عن نفسك و عن تصرفاتك .. و بتبقي نفسك هي الحاجه الوحيده اللي بتحكمك و تقدر تمنعك .. مش تبقي بتكلمي صاحبك .. و أول ما اخوكي أو أبوكي يدخل عليكي توقليله هكلِمك بعدين أو تكملي الحوار علي إنك بتكلمي واحده.. كده تبقي بتسرقي … احساسك انك خايفه لأنك بتعملي حاجه غلط سببه انك فعلاً بتعملي حاجه غلط.. كام واحد مصاحبه النهارده تقدر تبات مع صاحبها؟!!
غير دا كله معظم البنات بيصاحبوا بهدف  الجواز !!! أو ألعن … بتصاحب عشان تلاقي واحد يصرف عليها و يخرجها و يعزمها و يدلعها .. سيبك من إنه بيصرف عليها من جيبه أو من جيب أبوه متفرقش .. بس الشاب من دول مبيصرفش عليها عشان يبقي اسمه مصاحب … الشاب مننا لما بيصرف علي واحده بيبقي مستني انها ترد له الفلوس اللي دفعها بطرق تانيه.. دعارة متنكره يعني .. تيجي البنت من دول و تجيب ورا ساعة الجد و تقولك انا بنت.. معملش الكلام ده !!و ممكن لو طلعت كريمه شويه تضحك عليه ببوستين في السريع..  ساعتها الواد مننا يحس انه اتضحك عليه .. عشان كده يفرق معاهم قوي العربيه اللي راكبها و نوع السجاير اللي بيشربها .. مقاييس مبدئية .. البغل هيقدر يصرف عليها ولا لأ ..

أنا مش بتكلم عن تجربه شخصيه بس دي شوية ملاحظات بسيطة..
أمي عندها مبدأ .. كنت بقول أنه مبدأ طبقي .. لكن كل شويه بيبان أنه صح.. كانت بتقولي .. صاحب اللي زيك صبيان أو بنات.. سألتها يعني إيه.. قالتلي يعني يبقوا ناس زينا..
طلع الكلام دا مظبوط.. اللي زيك مش هيغير منك.. لأنه ببساطه عنده كل اللي عندك و يمكن أكتر..و غالباً مش هيبقي عايز منك حاجه..

1 Comment »

The URI to TrackBack this entry is: http://karanysh.blogsome.com/2007/07/07/p57/trackback/

  1. لللاسف كلامك صح .. ومقتنعه بيه تماما لاني ديما ائول لما ابئي مسئوله وبصرف علي نفسي ابئي اتصرف زي مانا عيزه بس دلوئتي لازم استاذن امي وابويا ولازم طبعا الواحد بيتزل علي ما بيوفئو علي حاجه …. بس بيتهيئلي برده الواحد لو بئي مسئول عن نفسه هيفضل محتاج للاذن من حد انا مش عرفه ليه ؟؟؟؟؟ …. لكن بالمناسبه بئي …. يعني انا وئعه في الموضوع دا اليومين دول …. اعرف واحد والمفروض انو اخر سنه كليه يعني مينفعش ابدا فكرة الارتباط الرسمي دلوئتي … الموضوع مش مصاحبه وكلام فارغ … الموضوع حب …. يمكن تؤلولي بلاش الكلام دا عشان كلام هجايس … بس فعلا حب …… وبالفعل عندي مشكلة الهويه دي بالرغم من اقنتاعي ان مينفعش اعمل حاجه في الضلمه يعني مينفعش احب في الضلمه كدا من ورا اهلي … بس فيها ايه لما الاهل يبئو فهمينا شويه وفهمين مشاعرنا ؟؟؟؟؟ مش كان زمنا مرتطبتين ادمهم …. علي العموم الموضوع بالنسبه ليا حتي المئابلات مش بتئبلها عشان برده سبب من ورا اهلي دا …. يعني يمكن لما الواحد يراعي ربنا في تصرفاته ربنا يوفئه … ادعولي … وموضوع هايل يا استاذ …وفعلا يعني مدونه هايله .. انا اول مره اهتم وائرا واكتب في مدونه كدا

    Comment by مروه — October 16, 2007 @ 9:43 am

RSS feed for comments on this post.

Leave a comment

Line and paragraph breaks automatic, e-mail address never displayed, HTML allowed: <a href="" title=""> <abbr title=""> <acronym title=""> <b> <blockquote cite=""> <code> <em> <i> <strike> <strong>



Anti-spam measure: please retype the above text into the box provided.